Ka shumë zyrtarë të cilët kanë ushtruar funksione publike edhe gjatë periudhës 1999-2010 dhe për të cilët është e pamundur të kontrollohet se si i kanë përfituar pasuritë. Nga kjo perspektivë, deklarimi i pasurisë nuk ka mandat për të shqyrtuar pasurinë e themeluar para vitit 2007 kur edhe ka hyrë në fuqi ligji. Në mungesë masash të retroaktivitetit, çdo zyrtar eventualisht ka mundur të përfitojë pasuri ndër vite për të cilat nuk ndihet llogaridhënës. Kjo perspektivë e mungesës së transparencës tregon për mendësinë “ortodokse” të interpretimit të rolit dhe funksionit të deklarimit të pasurisë, dhe si e tillë nuk mund të sjellë rezultate efektive në luftën kundër korrupsionit dhe veçmas atij të bartur në nivelet e larta politike e institucionale. Edhe pse procesi i deklarimit të pasurisë ka filluar në vitin 2007, regjistrat e deklarimit për herë të parë janë publikuar në vitin 2010, gjë që e pamundëson kontrollin nga jashtë për periudhën 2007-2010.